Hunc Ezechielis locum satis commode explicat Erasmus in sua Diatribe, dicens, In eo contineri usitatam figuram loquendi, qua cura in altero aliquid efficiendi significatur, illius opera minime exclusa: ac si quis (inquit) præceptor discipulo solœcizanti diceret, Exeram tibi linguam istam barbaricam, et inseram Romanam. Hæc sunt fere ipsius Erasmi verba. Quibus adde ex loco ipso satis apparere nullam necessitatem Deum significare voluisse, sed neque ullam vim interiorem, cum non alia ratione ea, quæ ibi pollicetur se effecturum, ostendat Deus, quam beneficiorum multitudine, quibus affecturus erat populum, ejusque cor et animum emolliturus:
1