Siquis propheticum dictum, ideo derivandum putet ad interpretationem Spiritus Sancti; quia habet, ‘annuncians in homines Christum suum,’ is ad incarnationis Dominicæ mysteria dictum facilius derivabit. Nam si te movet quia Spiritum dixit, et hoc non putas derivandum ad mysterium assumptionis humanæ; prosequere scripturas et invenies optime congruere de Christo, de quo bene convenit æstimari, quia firmavit tonitrua adventu suo; vim videlicet et sonum cœlestium scripturarum; quarum velut quodam tonitru mentes nostræ redduntur attonitæ, ut timere discamus, et reverntiam cœlestibus deferamus oraculis. Denique, in Evangelio fratres Domini filii tonitru dicebantur. Et cum vox Patris facta esset dicentis ad Filium, ‘Et honorificavi te, et iterum honorificabo,’ Judæi dicebant, ‘Tonitruum factum est illi.’:
1