Testimonia

Publiek archief van verzamelde en verwerkte bronrecords.
Overzicht / tekstblob

Tekstblob

sha256: a8d5d27eef5a6ed15ea4c429beddd56da6cac6368ee9e6b68b33764c8efb9333 · 2,274 tekens

Quoniam quidem inquit (apostolus) Deus erat in Christo, mundum reconcilians sibi, non imputans hominibus sua delicta, et deposuit apud nos verbum reconciliationis; in illo ergo justificamur coram Deo, non in nobis; non nostrâ sed illius justitiâ, quæ nobis cum illo jam communicantibus imputatur. Propriæ justitiæ inopes, extra nos, in illo docemur justitiam quærere. Cum inquit, ui peccatum non noverat, pro nobis peccatum fecit; hoc est, hostiam peccati expiatricem, ut nos efficeremur justitia Dei in ipso, non nostrâ, sed Dei justitiâ justi efficimur in Christo; quo jure? Amicitiæ, quæ communionem omnium inter amicos facit, juxta vetus et celebratissimum proverbium; Christo insertis, conglutinatis, et unitis, et sua nostra facit, suas divitias nobis communicat, suam justitiam inter Patris judicium et nostram injustitiam interponit, et sub ea veluti sub umbone ac clypeo a divina, quam commeruimus, ira nos abscondit, tuetur ac protegit; imo eandem nobis impertit et nostram facit, qua tecti ornatique audacter et secure jam divino nos sistamus tribunali et judicio: justique non solum appareamus, sed etiam simus. Quemadmodum enim unius delicto peccatores nos etiam factos affirmat apostolus: ita unius Christi justitiam in justificandis nobis omnibus efficacem esse; et sicut per inobedientiam unius hominis peccatores constituti sunt multi, sic per obedientiam unius justi (inquit) constituentur multi. Hæc est Christi justitia, ejus obedientia, qua voluntatem Patris sui perfecit in omnibus; sicut contrà nostra injustitia est nostra inobedientia, et mandatorum Dei prævaricatio. In Christi autem obedientia quod nostra collocatur justitia inde est, quod nobis illi incorporatis, ac si nostra esset, accepta ea fertur: ut eâ ipsâ etiam nos justi habeamur. Et velut ille quondam Jacob, quum nativitate primogenitus non esset, sub habitu fratris occultatus, atque ejus veste indutus, quæ odorem optimum spirabat, seipsum insinuavit patri, ut sub aliena persona benedictionem primogenituræ acciperet: ita et nos sub Christi primogeniti fratris nostri preciosa puritate delitescere, bono ejus odore fragrare, ejus perfectione vitia nostra sepeliri et obtegi, atque ita nos piissimo Patri ingerere, ut justitiæ benedictionem ab eodem assequamur, necesse est.” : 1

Alle records · Zoek op deze hash