“Si quis interroget quempiam
hæreticorum sibi talia persuadentem, Unde probas, unde doces quod
Ecclesiæ Catholicæ universalem et antiquam fidem dimittere
debeam? Statum ille, ‘Scriptum est enim,’ et
continuo mille testimonia, mille exempla, mille auctoritates parat
de Lege, de Psalmis, de Apostolis, de Prophetis, quibus, novo et
malo more interpretatis, ex arce Catholica in hæreseos barathrum
infelix anima præcipitetur. Audent enim polliceri et docere, quod
in Ecclesia sua, id est, in communionis suæ conventiculo, magna
et specialis ac plane personalis quædam sit Dei gratia, adeo
ut sine ullo labore, sine ullo studio, sine ulla industria,
etiamsi nec petant, nec quærant, nec pulsent, quicunque illi
ad numerum suum pertinent, tamen ita divinitus dispensentur, ut,
angelicis evecti manibus, id est, angelica protectione servati, nunquam
possint offendere ad lapidem pedem suum, id est, nunquam
scandalizari.”